SpaceX 22 та Starlink сунъий йўлдошини коинотга олиб чиқди

Американинг SpaceX компанияси 19 март, сешанба куни коинотга 22 та Starlink интернет сунъий йўлдошини учирди. Бу ҳақда Space.com хабар бермоқда.

Falcon 9 ракетаси 22 та Starlink сунъий йўлдоши билан Калифорниядаги учириш майдонидан ҳавога кўтарилди. Ракетанинг биринчи босқичи учирилгандан тахминан 8,5 дақиқа ўтиб Ерга қайтди. У Тинч океанида учувчисиз кемага вертикал равишда қўнди.

Сунъий йўлдошлар режалаштирилган орбитага учирилгандан сўнг тахминан 62,5 дақиқадан сўнг жойлаштирилди.

Falcon 9 учун бу йил бошидан буён 26-парвоз бўлиб, улардан 17 таси Starlink интернет сунъий йўлдошлари тармоғини ривожлантиришга қаратилган эди. Ҳозирда фазода 5500 дан ортиқ фаол Starlink сунъий йўлдошлари мавжуд, деб хабар беради korrespondent.net.