Шимолий Корея гипертовушли ракеталарни синовдан ўтказди

АҚШ Венесуелада амалга оширган операция фонида Шимолий Корея гипертовушли ракеталарни синовдан ўтказди.

Корея Марказий ахборот агентлигининг хабар беришича, 4 январ куни Корея Халқ Демократик Республикаси гипертовушли ракеталарни учириш бўйича машғулотлар ўтказган.

Агентлик баёнотига кўра, машғулотлар Рёкпхо ҳудудидан амалга оширилган. Ракеталар Япон денгизи акваториясида минг километр масофадаги нишонларни уриб туширган. КХДР етакчиси Ким Чен Ин машғулотларни шахсан кузатган.

"Биз ҳарбий воситаларни, аввало ҳужумкор қурол тизимларини изчил равишда такомиллаштириб боришимиз керак. Бу ўзимизни ҳимоя қилишимиз учун зарур чора. Бундай фаолият ядровий тийиб туриш салоҳиятимизни босқичма-босқич юқори ривожланиш даражасига етказишга қаратилган. Бунинг зарурлигини сўнгги геосиёсий инқироз ва мураккаб халқаро вазият ҳам тасдиқламоқда", — дея Ким Чен Иннинг сўзларидан иқтибос келтиради агентлик.

Reuters'нинг ёзишича, таҳлилчилар Шимолий Кореянинг ракета синовларини Пхеняннинг АҚШ томонидан Венесуелада амалга оширилган операцияга доир хавотири билан боғламоқда.