Saudi Aramco Украина дронларини сотиб олиш бўйича музокаралар олиб бормоқда

Дунёнинг энг йирик нефть компанияларидан бири бўлган Saudi Aramco ўзининг нефть конларини ҳужумлардан ҳимоя қилиш учун Украинанинг дронларини сотиб олиш бўйича музокаралар олиб бормоқда.

Бу ҳақда The Wall Street Journal манбаларга таяниб хабар берган.

Нашр SkyFall ва Wild Hornets билан музокаралар олиб бораётганини таъкидлайди, улар душман дронларини яқин масофада уриб ёки портлатиб зарарсизлантиришга қодир бўлган тўхтатувчи дронларни ишлаб чиқаради.

Манбаларга кўра, Саудия компанияси дронларни ҳукумат ва минтақавий рақобатчилардан, хусусан, Қатардан олдин қабул қилмоқчи.

Аввалроқ Украина президенти Владимир Зеленский Украина Америка ҳарбий базаларини ҳимоя қилиш учун Иорданияга тўхтатувчи дронлар ва дрон мутахассислари гуруҳини юборганини эълон қилган эди.