Самарқандда ИИБ ходими фирибгарликда айбланиб судланди

Суд хужжатларига кўра у Пастдарғом тумани ИИБда профилактика инспектори вазифасида ишлаган.

Маълум бўлишича, профилактика инспектори хизмат мавқеидан фойдаланиб, “Instagram” ижтимоий тармоғида Йўл-патрул хизмати ходимларини ҳақорат қилган қариндошининг ишини судга оширмасликни ваъда қилган.

Шу мақсадда у ҳамкасби орқали масалани “ёпиб қўйиш” баҳонасида қариндошидан ўртадаги воситачи орқали аввал 2000 АҚШ доллари, кейинчалик яна 800 АҚШ доллари талаб қилган.

2025 йил 3 сентябрь куни олдиндан келишилган 800 АҚШ долларини фирибгарлик йўли билан олган вақтида у ашёвий далиллар билан ушланган.

Жиноят ишлари бўйича Пастдарғом туман судининг 2025 йил 3 декабрдаги ҳукмига кўра, айбланувчи 2 йил муддатга ИИВ тизимида ишлаш ҳуқуқидан маҳрум этилган ҳамда 3 йил 11 ой 1 кун муддатга озодликни чеклаш жазосига ҳукм қилинган.