Россиянинг урушда ҳалок бўлган ҳарбийлари сони янги ёлланганлар сони билан деярли тенг

Россиянинг урушда ҳалок бўлган ҳарбийлари сони янги ёлланганлар сони билан деярли тенг — Bloomberg.

Бир қатор Европа давлатлари сўнгги ҳафталарда Россиянинг урушда ҳалок бўлган аскарлари сони кескин ошганини билдирмоқда.

Манбаларнинг айтишича, ҳалок бўлганлар сони янги сафарбар этилаётган аскарлар сонига деярли тенг бўлиб қолган. Бу эса Кремл учун сафарбарлик эълон қилмасдан туриб йўқотишлар ўрнини тўлдиришни қийинлаштирмоқда.

Йўқотишлар ошишининг сабабларидан бири сифатида дронлардан самаралироқ фойдаланилаётгани кўрсатилмоқда.

Айрим Европа давлатлари ҳукуматларининг фикрича, учувчисиз аппаратлар зарбалари эндиликда жароҳатланиш эмас, балки кўпроқ, ўлим билан якунланмоқда.

АҚШдаги CSIS (Стратегик ва халқаро тадқиқотлар маркази) баҳосига кўра, Россия 2022 йил февралидан буён жами 1,2 миллионгача одамни йўқотган, шундан 325 минг нафари ҳалок бўлган. BBC рус хизмати ва “Медиазона” нашри очиқ манбалар асосида Украинага қарши кенг кўламли босқин давомида ҳалок бўлган 165 мингдан ортиқ россиялик ҳарбийнинг шахсини аниқлаган.

Кремл CSIS ҳисоб-китобларига изоҳ беришдан бош тортиб, саволни Россия Мудофаа вазирлигига йўналтирган. Вазирлик эса жанг майдонидаги йўқотишлар ҳақида маълумот эълон қилмайди.