Россияда янги мудофаа гуруҳлари тузилмоқда

Ленинград вилояти губернатори Александр Дрозденко минтақа ҳаво ҳужумидан мудофаа тизимини кучайтириш режаларини эълон қилди ва резервчиларни ҳарбий комиссариат орқали уч йиллик шартнома тузишга чақирди.

Дрозденконинг сўзларига кўра, муҳим инфратузилма объектларида қўшимча "мобил ўт очиш гуруҳлари" ташкил этилади. Ушбу гуруҳларга Россиянинг Украинадаги уруши қатнашчилари, шунингдек, собиқ Иттифоқ ва Россия армиясининг истеъфодаги ҳарбийлари таклиф этилмоқда. Резервчилар ўзлари ҳимоя қиладиган корхона ва ташкилотларга ишга жойлаштирилади.

Маълумот учун, шу йилнинг март ойида Россиянинг Болтиқ денгизидаги энг йирик нефт экспорт қилиш қувватлари бўлган Приморск ва Усть-Луга портлари бир неча бор дронлар ҳужумига учраган ва ишини вақтинча тўхтатишга мажбур бўлган эди.