Россияда жорий йил 1 апрелдан Telegram тўлиқ блокланиши мумкин

Бу ҳақда “РБК” ва The Bell нашрлари ўз манбаларига таяниб хабар берди.

“РБК”нинг Кремлга яқин манбалари блоклаш бўйича қарор якуний эканини билдирган. The Bell'нинг Россия мобил операторларидан биридаги манбаси 1 апрелдан Telegram’ни блоклаш бўйича “дастлабки қарор” қабул қилингани айтган.

Baza маълумотига кўра, блоклаш “Россиянинг бутун ҳудудида” амал қилади. “РБК” мақоласида ёзилишича, апрелга бориб Telegram фақат фронт ҳудудида ишлайди. Россия ҳарбийлари ушбу мессенжер орқали жанговар ҳаракатлар зонасида мувофиқлаштириш олиб боради, гарчи Кремл буни тан олмаса ҳам. Россия Федерал хавфсизлик хизмати эса маълумотлар Украина махсус хизматлари томонидан қўлга олиниши хавфи ҳақида огоҳлантирган.