Россия ва КХДР ўртасида биринчи автомобиль кўприги очилди

Россия ва Шимолий Корея 7 сентябрь куни икки давлат ўртасидаги тарихда биринчи автомобиль кўпригида ҳаракатни очди. Кўприк чегарадаги Туманная дарёси устидан қурилган бўлиб, Россия ва КХДР ўртасида янги тўғридан-тўғри қуруқлик йўналишини яратди.

Қарийб бир километр узунликдаги кўприк икки ҳаракатланиш полосасига эга бўлиб, бир суткада 300 тагача автомобилни ўтказиш имкониятига мўлжалланган. У Россиянинг Приморье ўлкасидаги Хасан ҳудудини Шимолий Кореянинг Туманган тумани ва Расон махсус иқтисодий зонаси билан боғлайди. Йўл ва бошқа инфратузилма билан бирга янги транспорт йўналишининг умумий узунлиги тахминан 5 километрни ташкил этади.

Кўприк очилгунга қадар Россия ва КХДР ўртасидаги ягона доимий қуруқлик алоқаси 1959 йилда қурилган «Дўстлик» темирйўл кўприги орқали амалга оширилар эди. Янги автомобиль йўналиши темирйўл ва ҳаво қатновини тўлдириши кутилмоқда.

Кўприк қурилиши бўйича келишув 2024 йил июнь ойида Россия президенти Владимир Путиннинг КХДРга ташрифи давомида имзоланган. Қурилиш ишлари эса 2025 йил апрель ойида бошланган.

Янги кўприкка совет Қизил армияси офицери ва КХДР Меҳнат Қаҳрамони Яков Новиченко номи берилди. Россия ва Шимолий Корея расмийлари унинг номини икки давлат ўртасидаги тарихий муносабатлар билан боғламоқда.

2024 йил июнь ойида Москва ва Пхеньян кенг қамровли стратегик шериклик тўғрисидаги шартномани имзолаган. Унда томонлардан бири тажовузга учраган тақдирда ўзаро ёрдам кўрсатиш каби мажбуриятлар ҳам белгиланган. Кейинчалик икки давлат ўртасидаги ҳамкорлик ҳарбий-техник соҳани ҳам қамраб олди.

Россия ва Шимолий Корея ҳукуматлари янги кўприкни, аввало, савдо-иқтисодий алоқаларни кенгайтириш, юк ташишни ошириш, туризмни ривожлантириш ва икки давлат аҳолиси ўртасидаги алоқаларни кучайтиришга қаратилган инфратузилмавий лойиҳа сифатида баҳоламоқда.

Бироқ Буюк Британиянинг The Guardian нашри Украинадаги Truth Hounds ҳуқуқни ҳимоя қилиш ташкилоти маълумотларига таяниб, янги транспорт йўналиши ҳарбий логистика учун ҳам қўлланиши мумкинлигини ёзди. Хусусан, бу йўл орқали Шимолий Корея ҳарбийлари ва бошқа ресурсларни Россияга олиб ўтиш, шунингдек, Россиядан КХДРга технология ва ускуналар етказиб бериш имконияти ҳақида сўз бормоқда.

Украинадаги уруш давом этаётган, КХДРга нисбатан санкциялар сақланиб қолаётган ва Москва ҳамда Пхеньян ўртасидаги ҳарбий-сиёсий ҳамкорлик кенгайиб бораётган бир шароитда янги автомобиль кўприги икки давлат ўртасида шаклланаётган ҳамкорлик инфратузилмасининг яна бир муҳим элементига айланиши мумкин.