Россия Украинадаги урушда қарийб ярим миллион аскаридан айрилди

Бу ҳақда Буюк Британиянинг киберразведка агентлиги директори Энн Кист-Батлер илк оммавий нутқида маълум қилди.

"Путин жанг майдонида ортга чекинмоқда, бунинг устига янги разведка маълумотлари уруш бошланганидан буён ярим миллионга яқин россиялик аскар ҳалок бўлганини кўрсатмоқда", —деди Энн Кист‑Батлер.

У ўз нутқида Буюк Британия олдида турган хавф-хатарлар ва уларга қарши курашиш чораларини ҳам баён қилди. Разведка раҳбарининг огоҳлантиришича, ҳозирда Буюк Британия “жиддий оқибатларга олиб келиши мумкин бўлган палла”да турибди, чунки Россия бутун мамлакат бўйлаб муҳим инфратузилмаларни “тинимсиз равишда нишонга олмоқда”.

Шу билан бирга, у Кремлни Британия ҳудудида бир қатор жосуслик фитналарини уюштиришда, қиролликка ва бошқа NATO давлатларига қарши ”гибрид уруш” олиб боришда айблади.

Аввалроқ ғарблик таҳлилчилар ҳалок бўлган россиялик аскар ва офицерлар сонини 325 минг киши атрофида баҳолаган эди. Хусусан, 2026 йилнинг январ ҳолатига кўра бўлган бундай ҳисоб-китобларни Вашингтондаги Стратегик ва халқаро тадқиқотлар маркази (CSIS) келтириб ўтган. Унинг маълумотларига кўра, Россия Қуролли кучларининг Украинадаги умумий йўқотишлари (ярадорлар ва бедарак йўқолганларни қўшганда) 1,198 миллион кишига етган.

CSIS таҳлилчилари ушбу рақамларни “мисли кўрилмаган” деб атаб, Иккинчи жаҳон урушидан кейин бирорта ҳам етакчи давлат бундай катта йўқотишларга учрамаганини таъкидлаган. “Медиазона” ва BBC томонидан юритилаётган ҳалок бўлганларнинг рўйхатида ҳозиргача камида 221 206 нафар россиялик қайд этилган.