Россия пойтахтида 300 дан ортиқ рейс кечиктирилди

Россия пойтахтига дрон ҳужумлари туфайли шаҳардаги аэропортларда 300 дан ортиқ рейс кечиктирилди ва бекор қилинди.

“РИА Новости” хабарига кўра, Москванинг Шереметево ва Внуково аэропортларида 270 дан ортиқ рейс кечиктирилган, 42 таси бекор қилинган, яна 69 рейс захира аэродромларга йўналтирилган. Бунга дронлар ҳужуми туфайли жорий этилган чекловлар сабаб бўлган.

Шереметево ва Внуково аэропортларида 27 декабр куни Москва вақти билан тахминан соат 17:00 да парвозлар хавфсизлигини таъминлаш зарурати билан самолётларни қабул қилиш ва жўнатишга вақтинчалик чекловлар жорий қилинган. Москвадаги Домодедово аэропортида эса одатдаги тартибда ишлаётгани маълум қилинган.

Бир кун аввал Москва мэри Собянин ҳаво ҳужумидан мудофаа кучлари пойтахт томонга учиб келаётган камида 20 та дронни уриб туширганини билдирганди.