Роналдунинг "Челси"га трансферига ким тўсқинлик қилгани маълум бўлди

2022 йилда "Манчестер Юнайтед"ни тарк этган Криштиану Роналду фаолиятини Англиянинг бошқа бир топ-клубида давом эттириши мумкин эди.

Ўша даврда "Челси"ни сотиб олган Тодд Бёли жамоага жаҳон миқёсидаги юлдузни олиб келиш ғоясига жиддий қизиққан. Америкалик бизнесменнинг асосий вариантларидан бири айнан Роналду бўлган.

The New York Times нашрининг ёзишича, Бёли португалиялик футболчининг ўша пайтдаги агенти Жорже Мендеш билан учрашиб, трансфер имкониятини муҳокама қилган.

Бироқ лондонликлар бош мураббийи Томас Тухель бу ғояни қўллаб-қувватламаган. Немис мутахассиси Роналдуни жамоага олиб келишга қарши чиққан ва натижада эҳтимолий келишув амалга ошмаган.

Орадан кўп ўтмай, Криштиану Европани тарк этиб, Саудия Арабистони чемпионатига йўл олди. Португалиялик юлдуз ҳозир ҳам фаолиятини ушбу мамлакатда давом эттирмоқда.