Роналду фаолиятини якунлагач 30 млн евролик ҳашаматли уйга кўчиб ўтмоқчи

Криштиану Роналду Португалияда қурилган ҳашаматли уйига кўчиб ўтиши мумкин. Қимматбаҳо кўчмас мулкнинг қурилиши якунланди ва у 30 млн евродан юқори қийматга баҳоланмоқда.

Қирғоқ ҳудудидаги ушбу уй мамлакатдаги энг йирик ва энг қиммат кошоналардан бири саналади. Унда португалиялик юлдузнинг 12 млн фунт стерлинглик суперкарлар коллекцияси учун ер ости автопарки мавжуд.

Уйнинг қурилиши уч йилдан ортиқ вақт давом этди. 8 та ётоқхона, шунингдек, улкан шиша бассейн, ер остидан кузатиладиган сув йўлаги, ақлли иситиш тизими, спорт зали, ёпиқ ва очиқ бассейнлар, массаж хонаси ва кинозал билан жиҳозланган.

Роналду оиласи учун ҳам барча шароитлар яратилган: 5 нафар фарзанди учун махсус майдонча, шунингдек, футболчи ва унинг турмуш ўртоғи Жоржиня Родригез учун шахсий пляж мавжуд. Интерерда олтин кранлар, италянча мармар ва махсус буюртма асосида тайёрланган Louis Vuitton фрескаси ҳам борлиги айтилмоқда.

Шу билан бирга, футболчи янги уй яқинидаги гольф майдонини ҳам сотиб олишга уринган, бироқ таклиф қабул қилинмагани қайд этилган.