Римда мода оламининг “сўнгги императори” Валентино билан сўнгги видолашув бўлиб ўтди

Италиялик машҳур модельер Валентино Гаравани билан хайрлашув маросими Римдаги Santa Maria degli Angeli e dei Martiri базиликасида ўтди. 93 ёшида вафот этган дизайнерни жаҳон мода юлдузлари, машҳур шахслар ва минглаб мухлислар охирги йўлга кузатди.

Маросимда Том Форд, Донателла Версаче, Vogue журнали муҳаррири Анна Винтур, шунингдек, Голливуд актрисаси Энн Хэтэуэй иштирок этди. Черков ташқарисида йиғилган мухлислар Валентинонинг рамзий ранги ҳисобланган қизил либос ва аксессуарлар билан хотирага ҳурмат кўрсатишди.

Валентино Гаравани Италия модасининг “сўнгги императори” сифатида танилган бўлиб, унинг либослари йиллар давомида қироллик оилалари, биринчи хонумлар ва Голливуд юлдузлари томонидан кийиб келинган.

Унинг яқин ҳамкори Жанкарло Джамметти маросимда шундай деди:
“Валентино бизга гўзалликни ўргатди. Бу гўзаллик бутун ҳаётимиз давомида биз билан бирга бўлди”.