Расмий муносабат: Пиёда юриш акциясида короновирус касаллиги аниқланган ҳудуддан ҳеч ким иштирок этмаган

Жорий йилнинг 25 май куни Избоскан туманида ўтказилган ҳамда ижтимоий тармоқларда кенг муҳокамаларга сабаб бўлган “Соғлом хаёт учун 5000 қадам” пиёда юриш акцияси юзасидан Андижон вилояти ҳокимлиги Матбуот хизмати муносабат билдирди:

Избоскан туманида ўтказилган акция карантин тартиб-қоидаларига қатъий риоя қилинган ҳолда, туман Давлат санитария эпидемиология осойишталик маркази мутахассисларининг махсус назорати остида ташкил этилган. 

Бундан ташқари, акция ўтказиладиган ҳудудда, акция бошланишидан олдин  зарарсизлантириш ишлари олиб борилган. 

Тадбир аввалида барча акция иштирокчиларини махсус тиббий кўрикдан ўтказилиб, антисептик воситалари билан дезинфекция қилинган ҳолда иштирок этишга рухсат берилган. 

2020 йил 24 май куни туманнинг “Жонобод” МФЙ ҳудудида яшовчи фуқарода короновирус касаллиги борлиги аниқланган бўлиб, шу куннинг ўзида ушбу ҳудуд тезкорлик билан карантинга олинган. 

“Жонобод” МФЙ туман марказидан 6 км, акция ўтказилган ҳудуд (“Куйган ёр” МФЙ)дан 12 км узоқликда жойлашган бўлиб, ташкил этилган пиёда юриш акциясида ушбу ҳудуддан ҳеч ким иштирок этмаган.