Расман. Флорентино Перес «Реал» президенти этиб қайта сайланди

79 ёшли функционер Флорентино Перес Мадриднинг «Реал» клуби президентлиги учун сайловда ғалаба қозонди. Бу ҳақда Carrusel Deportivo YouTube канали эфирида маълум қилинди.

Перес сайловда испаниялик тадбиркор Энрике Рикельмени ортда қолдирди ва клубни 2030 йилгача бошқаришда давом этади. У мазкур лавозимни кетма-кет саккизинчи марта эгалламоқда.

Аввалроқ Перес сайловда ғалаба қозонса, жамоа бош мураббийлигига Жозе Моуринью тайинланиши мумкинлиги ҳақида хабарлар тарқалган эди. Шунингдек, қайта сайланган президент «Ливерпуль» ҳимоячиси Ибраима Конате ва «Интер» футболчиси Дензел Думфрис билан шартнома имзоланганини ҳам маълум қилган.

Якунланган Испания чемпионати мавсумида «Реал» иккинчи ўринни эгаллади. Мадридликлар чемпион бўлган «Барселона»дан 8 очко ортда қолди.