Қарздорликни суддан ташқари ундириш рағбатлантирилади

Ўзбекистон Республикаси Президентининг тадбиркорлар билан VI очиқ мулоқотида белгиланган вазифаларни амалга ошириш юзасидан «Иқтисодиётда давлат иштирокини қисқартириш ва хусусийлаштириш жараёнларини жадаллаштириш бўйича қўшимча чора-тадбирлар тўғрисида»ги Президент Фармони (ПФ–177-сон, 28.08.2026 й.) қабул қилинди.

Фармонга кўра, 2030 йил 1 январгача қарздорлик эвазига банклар ва инвестиция компаниялари балансига ўтган кўчмас мулклар бўйича солиқ имтиёзлари берилади.

▫️ Банклар мулкни балансига олганидан кейин 6 ой, инвестиция компаниялари эса 12 ой давомида мол-мулк ва ер солиқларидан озод этилади.

▫️ Мулкни тўлиқ тўлов асосида сотиб олган харидорларга ҳам 12 ой давомида ушбу солиқ имтиёзи берилади.

▫️ Мулк қарздорлик эвазига банкка ихтиёрий топширилганда, юридик шахс ҚҚС тўлашдан озод қилинади.

▫️ Банк балансидаги мулк 1 йилдан ортиқ муддатга бўлиб-бўлиб сотилса, ҚҚС фақат сотиш ва баланс қиймати ўртасидаги ижобий фарқдан ҳисобланади.

Шунингдек, давлат иштирокидаги банкларга қарздорлик эвазига олинган мулкни бозор қийматида тўғридан-тўғри сотиш, кредит, бўлиб-бўлиб тўлаш ёки лизинг асосида реализация қилишга рухсат берилади.

Агар банкларнинг Давлат активларини бошқариш агентлигига топширган мулклари 1 йил ичида сотилмаса, улар банкларга қайтарилади.