Путиннинг қатъиятсизлиги унинг таваккал қилишдан қочиш истагини кўрсатади

Америка урушни ўрганиш институти якшанба кунги ҳисоботида Россиянинг Украинада ҳарбий ҳаракатлар бошлаганидан кейин урушда қарор қабул қилишда Владимир Путиннинг эҳтиёткорона ёндашувига эътибор қаратди.

"Путиннинг қатъиятсизлиги унинг бошқарувига таҳдид соладиган ёки халқаро эскалацияга олиб келиши мумкин бўлган хавфли қадамлардан қочиш истагидан далолат беради, гарчи унинг мақсади — Украинани тўлиқ босиб олиш — муваффақиятга эришиш учун хавфли қарорларни талаб қилса ҳам", дея фикр билдирди ISW экспертлари.

"Путин бу борада зарур амалий ечимларни доимий равишда эътиборсиз қолдирди, кечиктирди ёки қисман амалга оширди.

Эҳтимол, Путин Россия кучлари Киевни ҳеч қандай муҳим ҳарбий йўқотишларсиз таслим бўлишга мажбур қилиши мумкин деган нотўғри тахминга асосланиб, Россия босқинини чекланган ва мақбул иш деб ҳисоблаган", дейилади ҳисоботда.

ISW экспертлари Россия президенти қатъиятсизлигининг кўриниши сифатида айнан нимани назарда тутмоқда?

— Путин 2022 йилнинг июнь-июль ойларида Северодонецк ва Лисичанскнинг қўлга киритилиши ва Россия ҳарбий кучлари кўп қисмини йўқотган бир қанча муваффақиятсиз ҳужумлардан сўнг тўлиқ сафарбарликка буйруқ беришни истамади;

— Путин 2022 йил май ойида Россия жамоатчилигининг заҳирадаги аскарларни сафарбар этиш, Украинага уруш эълон қилиш, Россияда ҳарбий ҳолат жорий этиш ва ҳарбий хизматга чақирув тизимини модернизация қилиш ҳақидаги такрорий чақириқларига муносабат билдирмади;

— Путин Россиянинг Украинадаги урушининг кўлами ва нархи ҳақида сирли қолиши учун чекланган уруш кўринишини сақлаб қолишга ҳаракат қилди;

— Украинадаги урушнинг бошидан декабрь ойи ўрталаригача Путин ҳарбий ҳаракатлар ҳақида изоҳ бериш учун бир неча марта омма олдида чиқиш қилди.

— Путин ўзининг ҳарбий мақсадларини қўллаб-қувватлаган, бироқ Россиянинг қатъиятсиз ҳарбий ҳаракатларини танқид қила бошлаган россиялик ҳарбийлар ва блогерлар, жамоат арбобларининг катта гуруҳини жим қилишга уринмади;

— Путин эълон қилинган 300 000 аскардан кўра кўпроқ сафарбарлик эълон қилиши мумкин эди, лекин бу унинг Россия жамиятидаги обрўсини янада пасайтиришидан қўрққан бўлиши мумкин;

— Путин Херсон, Запорожье, Донецк ва Луганск вилоятларидан ташқарида расман ҳарбий ҳолат эълон қилмади, аксинча, бу ҳудудларга Россия сафарбарлигини қўллаб-қувватлаш учун зарур бўлган ҳуқуқий базани яратишга кўрсатма берди.