Путин Украина билан зарбаларни қисман тўхтатиш таклифини «бемаъни» деб атади

Россия президенти Владимир Путин Украина билан зарбаларни қисман ўзаро тўхтатиш ҳақидаги таклифни «бемаъни» деб атади. У бу фикрни «Валдай» муҳокама клуби йиғилишида иштирокчилардан бирининг саволига жавоб берар экан билдирди.

Таклифга кўра, Украина Россиядаги нефтьни қайта ишлаш заводларига, Россия эса Украина ғалласи ташилаётган кемаларга зарба бермаслиги керак эди. Путин бундай келишувни маъқул эмас деб баҳолади.

Россия президентининг айтишича, Украина ҳужумлари оқибатида Россия нефтьни қайта ишлаш заводларидаги йўқотишлар мамлакат ЯИМининг тахминан 1 фоизини ташкил этган. Путин бу ҳужумлар зарар етказганини тан олган, аммо Россиянинг жавоб зарбаларидан кейин Украинада «энди пўлат ишлаб чиқариш саноати йўқ»лигини даъво қилди.

Путин шунингдек, дунёдаги можаролар давом этиши эҳтимоли юқори эканини айтди ва буни мавжуд тенденциялар билан изоҳлади. У халқаро вазиятнинг ёмонлашувида яна бир бор «Ғарб гегемонлиги» ва «куч бор — ақл керак эмас» тамойилига асосланган сиёсатни айблади.

Шу билан бирга, Путин сўнгги кунларда Москвадан янграган ядровий қуролдан фойдаланиш ҳақидаги баёнотлар кескинлигини пасайтиришга уринди. Унинг таъкидлашича, Россия Ташқи ишлар вазирлигининг Европа давлатларига юборган дипломатик ноталарида ядровий қуролдан фойдаланиш эҳтимоли тилга олинмаган ва Москвада бундай ният йўқ.