Пентагон Европада АҚШнинг 40 минггача ҳарбий хизматчисини чиқаришни кўриб чиқмоқда — NBC

Пентагон Европадаги Америка ҳарбий контингентини камида 25 минг кишига қисқартиришни кўриб чиқмоқда. Вариантлардан бири ҳозирги ҳарбийлар сонининг ярмига тенг бўлган 40 минггача ҳарбий хизматчини Европадан олиб чиқишни назарда тутади.

Бу ҳақда NBC News амалдаги ва собиқ америкалик ҳамда ғарблик амалдорларга таяниб хабар бермоқда. Ҳозирча якуний қарор қабул қилинмаган.

Қисқартириш энг кўп Германия, Италия ва Испанияга таъсир қилиши мумкин. Ҳозир Германияда қарийб 36 минг нафар америкалик ҳарбий хизматчи жойлашган.

Тўртта сценарий кўриб чиқилмоқда. Улар қуруқликдаги, ҳаво ва денгиз кучларини қисқартиришни ўз ичига олади. Айрим бўлинмалар Европадан бутунлай олиб чиқилмасдан, НАТОнинг шарқий қанотига яқинроқ ҳудудларга кўчирилиши мумкин.

Мудофаа вазири Пит Хегсетга якуний тавсияни 6 ноябрга қадар тақдим этиш кутилмоқда. Шундан сўнг таклифлар Дональд Трампга тақдим этилиши мумкин.

Айни вақтда Вашингтон Польшада доимий ҳарбий ҳузурни кучайтириш масаласини ҳам муҳокама қилмоқда. Трамп 17 сентябрь куни у ерда АҚШ армиясининг янги базасини ташкил этиш бўйича музокараларда **«сезиларли тараққиёт»**га эришилганини айтди.