Озарбайжон Ғарбнинг замонавий уруш олиб бориш усулларини Украинадан олдин ўзлаштирган

Россия-Украина уруши ҳарбий ишларда янги даврнинг бошланиши сифатида баҳоланмоқда. FPV-дронлар, узоқ масофага зарба берувчи учувчисиз аппаратлар, қуруқлик ва денгизда ҳаракатланувчи беспилот тизимлар ҳамда ракета қуролларининг кенг қўлланилиши кўплаб экспертларни танклар ва бронетехниканинг аввалги аҳамияти пасайгани ҳақида фикр билдиришга ундади.

Бироқ ушбу ўзгаришнинг дастлабки муҳим сабоқлари 2020 йилдаги Иккинчи Қорабоғ уруши давомидаёқ намоён бўлган. Бу ҳақда британиялик сиёсатшунос Тарас Кузио Eurasia Review нашридаги мақоласида ёзган.

Унинг фикрича, Озарбайжон ва Украина Туркия ҳамда НАТО стандартларига мос ҳарбий тайёргарлик усулларини қўллаш орқали муваффақиятга эришган. Бундай усуллар кичик командирлар институтини ривожлантириш, жанговар вазифаларни бажаришда ваколатларни қуйи бўғинларга бериш, мослашувчан тактика, шаҳар шароитида жанг олиб бориш, радиоэлектрон кураш воситаларига қарши чоралар кўриш ва жанг майдонида шахсий тиббий воситалардан фойдаланишни ўз ичига олади.

Муаллиф таъкидлашича, уларнинг рақиблари — Арманистон ва Россия қўшинлари — совет давридан қолган иерархик бошқарув тизими, заиф алоқа, эскирган тиббий таъминот ва ҳарбий хизматчиларга нисбатан етарлича эътибор берилмаслиги каби муаммоларни сақлаб қолган.

Кузио Арманистоннинг кўплаб юқори мартабали офицерлари фронт чизиғига яқин ҳудудларда бўлгани сабабли ҳалок бўлганини қайд этади. Унинг фикрича, кичик командирлар тизимининг етарлича ривожланмагани Россия армиясида ҳам юқори офицерлар орасида катта йўқотишларга олиб келган. Муаллиф бу қўшинларнинг ҳарбий ҳаракатлари олдиндан тахмин қилиш мумкин бўлганини таъкидлайди.

Сиёсатшуноснинг ёзишича, Ғарб ва Туркия стандартлари асосида тайёрланган қуролли кучлар дронлар билан тўйинган ҳаво макони шароитига мослашиб, махсус операциялар бўлинмаларига кўпроқ эътибор қарата бошлаган.

Шу билан бирга, унинг фикрича, НАТОнинг аксарият армиялари ва уларга қурол-яроғ етказиб берувчи компаниялар бу сабоқларни ҳали секин ўзлаштирмоқда. Улар ХХ аср услубида жанг олиб борадиган рақибларга қарши самарадорлигини кўрсатган нисбатан арзон воситалар ва ҳарбий тайёргарликни ислоҳ қилиш ўрнига, қимматбаҳо анъанавий қурол-яроғ тизимларига устувор аҳамият беришда давом этмоқда.