Оқ уй Россияда ўлатга гумон қилинган ҳолатни кузатмоқда

АҚШ президенти Доналд Трамп маъмурияти Россияда ўлат тарқалаётгани ҳақидаги хабарлардан хабардор. Бу ҳақда Оқ уй вакили Axios нашрига маълум қилди.

Унинг айтишича, АҚШ маъмурияти вазиятни кузатмоқда ва эҳтимолий чораларни кўриб чиқмоқда.

2 октябрь куни ОАВ 28 ёшли Дарья Шипилова Иркутск вилоятидаги Шелехов тумани шифохонасида ўпка ўлатидан вафот этгани ҳақида хабар берди. У ўлатга қарши кураш институтида лаборант бўлиб ишлаган.

Россия расмийлари бу маълумотни тасдиқламади. Роспотребнадзор Иркутск вилояти, Иркутск ва Шелеховда санитария-эпидемиологик вазият барқарор эканини билдирди.

4 октябрь куни “Люди Байкала” нашри Иркутскдаги бир нечта шифохонада уч ҳафталик карантин жорий этилгани ҳақида хабар берди. Нашр манбасига кўра, шифокорлар ўлат ҳақида гапира бошлаган, аммо расмий ҳужжатларда бу ташхис қайд этилмаган.

Шипилова 29 сентябрь куни шифохонага ётқизилган ва икки кундан кейин вафот этган. ОАВ унинг касалликни Таиланддан қайтганидан кейин юқтиргани ҳақида ёзди. Бошқа версияга кўра, у тасодифан ўлат қўзғатувчиси бўлган пробиркани синдириб қўйган.