Нью-Йорк мэрининг 7 октябр баёноти баҳсларга сабаб бўляпти

Нью-Йорк мэри Зохран Мамдани 2023 йил 7 октябрдаги ҲАМАС ҳужумининг уч йиллиги муносабати билан эълон қилган баёнотида Исроил ҳукуматини Ғазода «давом этаётган геноцид», «оккупация», «апартеид» ва «ҳарбий жиноятлар»да айблади. Бу баёнот АҚШдаги айрим яҳудий ташкилотлари ва Исроил вакилларининг кескин танқидига сабаб бўлди.

Мамдани баёнотининг аввалида 2023 йил 7 октябрда ҲАМАС томонидан 1100 дан ортиқ исроиллик ўлдирилгани ва 251 киши гаровга олинганини қайд этди ҳамда қурбонлар яқинларига ҳамдардлик билдирди. Кейин у Ғазодаги уруш оқибатларига тўхталиб, 74 мингдан зиёд фаластинлик, жумладан 21 мингдан ортиқ бола ҳалок бўлганини айтди.

Нью-Йорк мэри АҚШнинг Исроилга қурол етказиб беришини ҳам танқид қилиб, Вашингтонни Исроилнинг ҳаракатларига шерик бўлаётганликда айблади.

Бироқ Исроил ҳукумати Ғазода геноцид амалга оширилаётгани ҳақидаги айбловларни рад этиб келади. Исроил томони армия ҳарбий нишонларга зарба бераётгани ва тинч аҳоли орасидаги қурбонларни камайтириш чоралари кўрилаётганини таъкидлайди.

Мамданининг баёнотидан кейин Антидиффамация лигаси (АҚШда жойлашган, яҳудий халқини камситиш ва антисемитизмга қарши курашувчи халқаро ҳуқуқ ҳимояси ташкилоти) раҳбари Жонатан Гринблатт уни танқид қилди. У мэр баёнотида «яҳудийлар» сўзи бир марта ҳам тилга олинмаганини таъкидлаб, 7 октябр хотира куни сиёсий позицияни илгари суриш учун ишлатилганини айтди.

Исроилнинг Нью-Йоркдаги бош консули Офир Акунис ҳам Мамданининг баёнотини кескин танқид қилди ва уни 7 октябр қурбонлари хотирасига нисбатан ҳурматсизлик деб баҳолади.

Эслатиб ўтамиз, Зохран Мамдани 2026 йил 1 январдан Нью-Йорк мэри лавозимида ишламоқда. У аввал ҳам Исроилнинг Ғазодаги сиёсатига нисбатан кескин танқидий позицияси билан танилган.