Исроил бош вазири Беньямин Нетаньяху АҚШ президенти Дональд Трамп Фаластин давлати мустақиллигини тан олмоқчи, деган даъволарга аҳамият бермаслик кераклигини айтди. Бу ҳақда i24 News нашри хабар берди.
Нашрнинг ёзишича, Кнессетнинг ташқи ишлар ва мудофаа қўмитасининг ёпиқ йиғилишида сўзга чиққан Нетаньяху Трамп билан муносабатлардаги кескинлик ҳақидаги миш-мишларни рад этиб, уларни АҚШнинг Исроилдаги элчиси Майк Хакаби ҳам рад этганини қайд этган. Унинг қўшимча қилишича, у Трамп билан мунтазам алоқада бўлиб туради ва томонлар "кўп масалалар бўйича ўхшаш қарашларга эга".
Аввалроқ Исроил оммавий ахборот воситалари икки етакчи ўртасидаги муносабатлар гўёки ёмонлашгани ва Трамп Нетаньяхуни сиёсий манипуляцияда гумон қилаётгани ҳақида хабар берган эди.
Трампнинг Фаластин давлатини расман тан олиши мумкинлиги ҳақидаги хабарларга ишора қилиб, Нетаньяху шундай деди: “Менимча, сиз Фаластин давлатини барпо этиш ҳақида жиддий баёнот эшитмайсиз – бу шунчаки сиёсий ўйин.
Баъзи Исроил ОАВлари Форс кўрфази мамлакатлари дипломатларига таяниб, Трамп Яқин Шарққа бўлажак ташрифи чоғида ҳам худди шундай баёнот билан чиқиши мумкинлигини ёзди. Уларга кўра, бу баёнот Ар-Риёдда бўлиб ўтадиган АҚШ-Саудия Арабистони саммитида айтилиши мумкин. Шунингдек, Америка президенти Қатар ва Бирлашган Араб Амирликларига ҳам ташриф буюришни режалаштиргани хабар қилинган.
