Нефть нархи $108 дан ошди: Яқин Шарқдаги кескинлик бозорни "силкитди"

Brent русумли нефть нархи бир баррел учун $108 дан ошиб, сўнгги тўрт ойдаги энг юқори кўрсаткичга етди. Ҳафта давомида нефть тахминан 11 фоизга қимматлашди.

Нархларнинг ошишига асосий сабаблардан бири АҚШ ва Эрон ўртасидаги қарама-қаршилик фонида Ормуз бўғози орқали нефть ташишдаги чекловлар сақланиб қолаётганидир. Жума куни Brent нархи деярли $110 гача кўтарилган.

Шу билан бирга, Эрон томонидан қўллаб-қувватланаётган Яман ҳусийлари Қизил денгиз соҳилидаги Моха портини эгаллаб, стратегик аҳамиятга эга Баб-эль-Мандеб бўғозига яқинлашган.

Баб-эль-Мандеб бўғози Қизил денгиз, Суэц канали ва Ҳинд океанини боғловчи муҳим денгиз йўли ҳисобланади. Ҳусийларнинг бу ҳудуддаги мавқеи кучайиши Саудия нефтини экспорт қилиш ва халқаро кемалар қатнови учун қўшимча хавф туғдирмоқда.

Вазиятнинг узоқ давом этишидан хавотирланган инвесторлар энергетика инқирози чўзилиши мумкинлигидан хавотирда. RBC Capital Markets таҳлилчилари вазият янада ёмонлашса, Brent нархи $122 гача кўтарилиши мумкинлигини айтмоқда.

Нефть нархининг ошиши жаҳон иқтисодиётида инфляция хавфини ҳам кучайтирмоқда. Энергия ресурсларининг қимматлашиши йирик марказий банкларни пул-кредит сиёсатини янада қатъийлаштиришга мажбур қилиши мумкин. Бу эса акциялар ва облигациялар бозорига қўшимча босим ўтказади.