НАТО ҳаво мудофаа тизими Туркияда Эрон ракетасини уриб туширди

Туркия томон йўналтирилган Эрон баллистик ракетаси НАТОнинг ҳаво ва ракетага қарши мудофаа тизимлари томонидан уриб туширилди. Бу ҳақда Туркия президенти маъмурияти алоқа бошқармаси раҳбари Бурҳонеттин Дуран маълум қилди.

Унинг сўзларига кўра, Эрондан учирилган ва Туркияга йўналтирилган ракета Газиантеп вилоятининг Шоҳинбей тумани осмонида дарҳол аниқланиб, НАТО ҳаво мудофаа тизимлари томонидан йўқ қилинган. Ҳодиса оқибатида ҳеч ким жабрланмаган.

Дуран тегишли идоралар вазиятни диққат билан кузатаётганини ва мамлакат хавфсизлигини таъминлаш учун зарур чоралар кўрилаётганини таъкидлади.

Шунингдек, у минтақадаги кескинликни кучайтирмаслик ва можаро ҳудудини кенгайтирмаслик муҳимлигини айтди. Дуран можаро иштирокчиларини, айниқса Эронни, минтақавий хавфсизликка таҳдид солиши мумкин бўлган ҳаракатлардан тийилишга чақирди.

У Туркия фуқароларига ахборот олишда фақат расмий манбаларга таянишни тавсия қилди.