«Нархоз»га ўқишга киритиб қўйиш учун 15 минг доллар сўраган шахс ушланди

Қайд этилишича, ушбу шахс бошқа бир фуқаронинг ишончига кириб, юқори лавозимда ишловчи танишлари орқали уни Тошкент давлат иқтисодиёт университетига ўқишга киритиб қўйишни ваъда қилган. Фақат бу «хизмат» 15 минг долларга тушишини маълум қилган.

У 15 минг долларни санаб олаётган вақтда Бош прокуратура ҳузуридаги департаментнинг Олмазор туман бўлими томонидан ДХХ ва Коррупцияга қарши курашиш агентлиги ходимлари билан ҳамкорликда ўтказилган тезкор тадбирда ашёвий далиллар билан ушланган.

«Айни пайтда мазкур ҳолат юзасидан Жиноят кодексининг тегишли моддалари билан жиноят иши қўзғатилиб, тергов ҳаракатлари ўтказилмоқда», дейилади Иқтисодий жиноятларга қарши курашиш департаменти хабарида.