Коронавирус пандемия туфайли Россия фуқароларининг Хитойга кириши вақтинча тақиқланди.
«Эпидемиологик вазият муносабати билан амалдаги Хитой визалари ҳамда ишлашни, шахсий муаммоларни ҳал қилишни ва оиланинг бирлашишини кўзда тутувчи яшаш рухсатномаларига эга шахсларнинг Хитойга кириши вақтинча тўхтатилганини маълум қиламиз. Хитойнинг Россия Федерациясидаги элчихонаси (консуллиги) юқорида тилга олинган шахсларга «саломатлик тўғрисида мурожаат»ни бермайди», – дейилади Хитойнинг Москвадаги элчихонаси тарқатган баёнотда.
Шу билан бирга элчихона мазкур чеклов дипломатик ва хизмат визаси эгалари ҳамда С тоифали визаси бор шахсларга таъсир қилмаслигини билдирган. Элчихонанинг таъкидлашича, бу чеклов Хитой томонидан ҳозирги эпидемиологик вазиятда аҳоли саломатлигини сақлаш мақсадида қабул қилинган мажбурий қарордир.
Россияда сўнгги кунларда коронавирус билан боғлиқ вазият оғирлашаётгани кузатилмоқда – кунига 19 мингдан ортиқ кишида ушбу инфекция аниқланяпти. Ҳозирга қадар коронавирус билан касалланганлар сони 1 миллион 700 мингдан ошиб кетди. Россия президентининг матбуот котиби Дмитрий Песков вазият хавотирли, бироқ назоратда эканлигини маълум қилди.
