Москвада фирибгарлар пенсионердан 27 миллион рублдан ортиқ пулни ўғирлади

Телефон орқали фирибгарлик қилган шахслар ўзларини иш берувчи ва ҳуқуқни муҳофаза қилувчи органлар ходимлари сифатида таништириб, 85 ёшли москва­лик пенсионердан 27 миллион рублдан ортиқ пулни қўлга киритишди. Улар эркакни мол-мулкини сотишга ва пулларни курьерларга топширишга ишонтирган. Бу ҳақда Москва прокуратураси хабар берди.

Идора маълумотига кўра, эркакка мессенжер орқали гўёки иш берувчисидан хабар келган. Унга текширув ўтказилиши ва ҳуқуқни муҳофаза қилувчи органлар ходимлари қўнғироқ қилиши ҳақида огоҳлантириш берилган. Кўп ўтмай, пенсионерга ўзини ҳуқуқ-тартибот идораси ходими деб таништирган шахс қўнғироқ қилиб, унинг банк ҳисобларидан пул ўғирлашга уринишлар бўлаётганини айтган. У фирибгарларни қўлга олишга ёрдам бериш учун махсус иловани ўрнатишга ҳам кўндирган.

Жиноятчилар эркакка унга қарши фирибгарлар ҳаракат қилаётганини айтиб, маблағларини зудлик билан банк ҳисобларидан ечиб олиш ва кейинчалик қайтариб бериш шарти билан гўёки махсус ҳисобга ўтказиш зарурлигини уқтиришган.

«Фирибгарларнинг тўлиқ назорати остида қолган кекса эркак турли банклардаги ҳисобларидан жамғармаларини ечиб олган, шунингдек, олтин қуймалар сотиб олиб, уларни ўзига паролларни айтган сохта ҳуқуқни муҳофаза қилувчи органлар ходимларига топширган. Телефон орқали кўрсатма бериб турган шахснинг буйруғи билан эркак ўзига тегишли гараж ва автомобильни сотган, дўстларидан қарз олган ва барча пулларни курьерларга берган. Етказилган умумий зарар 27 миллион рублдан ошган», — дейилади прокуратуранинг «Макс» платформасидаги расмий каналида.

Маълум қилинишича, фирибгарликка алоқадор шахсларни аниқлаш масаласи Бутирка туманлараро прокуратураси назоратига олинган.