Модрич Мессига етиб олди

Хорватиялик ярим ҳимоячи Лука Модрич миллий терма жамоа сафидаги ўйинлари сонини 198 тага етказиб олди. Бу натижа унга мазкур кўрсаткич бўйича аргентиналик ҳужумчи Лионель Месси билан бирга иккинчи ўринни бўлишиб олиш имконини берди.

Ушбу натижа Словенияга қарши кечган ўртоқлик учрашувида (2:1) қайд этилди. Мазкур баҳсда Модрич, шунингдек, учрашувдаги ҳисобни ҳам очди.

Бу борада мутлақ рекордчи португалиялик Криштиану Роналду (227 та ўйин) бўлиб турибди. Ушбу уччала футболчи ҳам ўз жамоаларининг бўлажак Жаҳон чемпионати (ЖЧ-2026) финал босқичи учун тасдиқланган якуний қайдномасидан жой олган.

40 ёшли Лука Модрич 2025 йилнинг июль ойидан буён «Милан» шарафини ҳимоя қилиб келмоқда. Бунгача (2012 йил ёзидан) у «Реал»да, ундан аввал эса Загребнинг «Динамо»си ҳамда «Тоттенхэм» клубларида тўп сурган. «Реал»даги фаолияти давомида у 6 марта Чемпионлар лигасида, 5 марта клублар ўртасидаги жаҳон чемпионатида, 4 марта Испания чемпионатида, 2 марта Испания кубогида ва 5 марта Испания суперкубогида зафар қучган.

2018 йилда маҳоратли ярим ҳимоячи «Олтин тўп» совринини қўлга киритган. Шунингдек, унинг ҳисобида жаҳон чемпионатларининг кумуш (2018) ва бронза (2022) медаллари ҳам бор. ЖЧ-2026 у учун фаолиятидаги бешинчи Жаҳон чемпионати бўлади.