Месси чўмилтирган чақалоқ энди унга қарши ЖЧ финалида майдонга тушади

Месси бир вақтлар Ламин Ямални чўмилтирган, энди эса у билан ЖЧ–2026 финалида тўқнаш келади.

2007 йил сентябрида 20 ёшли Лионель Месси «Барселона» клубининг ЮНИСЕФ билан ҳамкорликда ўтказган хайрия фотосессиясида иштирок этган. Календарь учун ташкил этилган суратга олиш жараёнида аргентиналик юлдуздан чақалоқ билан суратга тушиш ва уни чўмилтиришда қатнашиш сўралган.

Фотограф Жоан Монфортнинг эслашича, Месси аввалига болани қандай ушлашни билмай, бироз ҳаяжонланган. Бироқ чақалоқ хотиржам бўлган ва ҳатто Мессига кулиб турган. Ўша чақалоқ кейинчалик Испания футболининг ёрқин иқтидорига айланган Ламин Ямал эди.

Ямалнинг оиласи хайрия ташкилотлари ўртасида ўтказилган танлов ғолиби сифатида фотосессияда қатнашиш имкониятини қўлга киритган. Улар «Камп Ноу» стадионига сафар ва «Барселона» футболчиларидан бири билан суратга тушиш ҳуқуқини ютиб олган. Ким билан суратга тушишлари олдиндан маълум бўлмаган, Месси уларга қуръа орқали насиб этган. Суратлар стадионнинг меҳмонлар кийиниш хонасида олинган, кичик Ламин эса онаси билан бирга бўлган.

Календарь нашр этилгандан кейин бу суратлар деярли унутилиб кетган. Ҳатто фотографнинг ўзи ҳам узоқ вақт давомида расмдаги чақалоқ кейинчалик «Барселона» ва Испания терма жамоасининг юлдузига айланганини билмаган.

Ҳаммаси 2024 йил ёзида Ламин Ямалнинг отаси ушбу суратларни ижтимоий тармоқларда эълон қилгач ўзгарди. Айниқса, Ямалнинг 16 ёшида Европа чемпионатидаги ёрқин ўйини ва Испаниянинг чемпионликни қўлга киритиши ортидан бу суратлар бутун дунё бўйлаб кенг тарқалди.

Энди эса бу воқеа янги давомга эга бўлмоқда. Тасодифий «чўмилтириш» учрашувидан қарийб 19 йил ўтиб, Лионель Месси ва Ламин Ямал Жаҳон чемпионати–2026 финалида ўз миллий терма жамоаларининг етакчи футболчилари сифатида бир-бирига қарши майдонга тушади.