Мбаппе 2027 йилда шартнома имзоламаса, "Реал" уни сотиши мумкин

Ҳужумчи Килиан Мбаппе "Реал"ни тарк этиши мумкин. Бу ҳақда журналист Жуан Жезус хабар берди.

Манба маълумотига кўра, франциялик футболчининг вакиллари янги шартнома масаласини муҳокама қилиш учун мавсум бошланиши олдидан "Реал" билан ўтказилиши режалаштирилган учрашувни кейинга қолдиришга қарор қилган. Мадрид клубида бундай учрашувларнинг кечиктирилиши тасодиф эмаслигини яхши тушунишмоқда.

"Реал" президенти Флорентино Перес Мбаппени ўз лойиҳасининг марказий фигураси деб ҳисоблайди ва ҳужумчининг жамоани тарк этиши вариантини кўриб чиқмаяпти.

Бироқ клубнинг позицияси аниқ: агар Килиан 2027 йил ёзида янги шартнома имзоламаса, уни трансферга қўйишга тўғри келади.

Чунки 2028 йилга келиб Мбаппенинг "Реал" билан шартномаси тугашига атиги бир йил қолади. Бундай вазиятда Мадрид клуби футболчини кейинчалик текинга йўқотиб қўйиш хавфига дуч келиши мумкин.