Марказий Европада рекорд аномал иссиқлик

Австрия ва Словакияда чоршанба, 5 август куни кузатувлар тарихидаги энг иссиқ кун қайд этилди.

GeoSphere Austria миллий метеорология хизмати маълумотларига кўра, Қуйи Австрия федерал органидаги Бад-Дойч-Альтенбург кичик шаҳрида кундузи ҳаво ҳарорати 41,2 даража Цельсийгача кўтарилди.

Австрия пойтахти Венада ҳаво ҳарорати сешанба куниёқ миллий рекордни янгилаб, 41 даражага етган эди. Мамлакатдаги аномал иссиқ ва қурғоқчилик одамлар ҳамда табиатга тобора кўпроқ таъсир ўтказмоқда. Баъзи аҳоли пунктлари сув танқислиги билан курашаётган бир пайтда, Дунай ва бошқа дарёларда сув сатҳи пасайиб кетгани сабабли кемалар ҳаракати қисман тўхтаб қолди. Миллий метеорология хизмати, шунингдек, чоршанба куни нозик аҳоли қатламлари учун «экстремал иссиқлик стресси» ҳақида огоҳлантирди.

Кузатувлар тарихидаги энг юқори ҳаво ҳарорати Словакияда ҳам қайд этилди: 41,4°С. Бу ҳақда Словакия гидрометеорология институти ўз веб-сайтида маълум қилди.

«Словакиянинг жанубий қисмидаги Каменице-над-Гроном аҳоли пунктида жойлашган метеорология станцияси 41,4°С ҳаво ҳароратини қайд этди», — дейилади хабарда.

Словакиядаги аввалги ҳарорат рекорди жорий йилнинг 30 июнь куни айнан Каменице-над-Грономда қайд этилган эди. Ўша куни термометр кўрсаткичи 41,3°С гача кўтарилган эди.

Аномал иссиқлик бу ёзда нафақат Словакияда, балки Марказий Европанинг бошқа мамлакатларида ҳам кузатилмоқда. Чехияда, масалан, фаолият юритаётган 170 та метеостанциядан 156 таси 5 август куни учун янги ҳарорат рекордларини қайд этди. Словакия билан чегарадош ҳудудларда термометрлар 41°С ни кўрсатди.