Макрон оммавий тартибсизликлар юзасидан баёнот берди

Макрон ҳукуматдан тартибсизликлар такрорланмаслиги учун чоралар кўришни талаб қилди.

Франция президенти Эммануэль Макрон мамлакатда кўча тартибсизликлари такрорланмаслиги учун ҳукуматдан зарур чораларни кўришни талаб қилганини маълум қилди.

«Ҳукуматдан разведка маълумотларини тўплаш ва бундай воқеаларни олдиндан прогноз қилиш масалалари бўйича барча зарур хулосаларни чиқаришни, шунингдек, бундай ҳолатлар бошқа такрорланмаслиги учун чоралар кўришни талаб қилдим», — деди Макрон BFMTV телеканали орқали намойиш этилган халққа мурожаатида.

Франция раҳбари аниқ жавобларни кутаётганини ҳам таъкидлади.

Бир кун аввал Франциянинг бутун ҳудудида кенг кўламли намойишлар бўлиб ўтди. Бир неча ҳафтадан бери норозилик намойишларида қатнашиб келаётган юқори синф ўқувчилари ва талабаларга ўта сўл фаоллар, «сариқ нимчалар» ҳаракати тарафдорлари, таксичилар, ҳамширалар, қурувчилар ва касаба уюшмалари вакиллари қўшилди.

Намойишчилар турмуш қийматининг ошиши ва нархларнинг кўтарилишига норозилик билдириб, кўчаларга чиқди. Қатнашчиларнинг умумий сони 550 минг кишига етди.

Намойишлар полиция билан кескин тўқнашувлар, оммавий тартибсизликлар, талон-торож ва вандализм ҳолатлари билан кечди. Радикал кайфиятдаги ёшлар дўконларни вайрон қилди ва ўт қўйиш ҳолатларини содир этди.

Тартибни тиклаш учун ҳуқуқни муҳофаза қилувчи органлар кўздан ёш оқизувчи газ, шовқинли гранаталар ва сув пуркагичлардан фойдаланди.

Ҳодисалар давомида икки мингдан ортиқ киши қўлга олинди. 600 нафардан зиёд ҳуқуқни муҳофаза қилувчи органлар ходимлари ва ўт ўчирувчилар жароҳат олди.