Халқаро атом энергияси агентлиги (МАГАТЭ) Шимолий Корея ядровий дастурини кенгайтиришда давом этаётганини маълум қилди. Агентлик таҳлилига кўра, мамлакатда янги уран бойитиш иншоотлари қурилмоқда.
МАГАТЭ спутник тасвирлари, очиқ маълумотлар, шунингдек, Шимолий Корея давлат оммавий ахборот воситалари тарқатган фото ва видеолар таҳлили асосида мамлакат ядровий инфратузилмасини фаол равишда кенгайтираётганини қайд этди.
Агентлик маълумотларига кўра, Шимолий Кореянинг Ёнбёндаги асосий ядровий мажмуасида икки қаватли янги уран бойитиш биноси барпо этилган. У 28 тагача центрифуга каскадини жойлаштириш имкониятига эга бўлиши мумкин.
Шунингдек, 2024 йилдан буён қурилаётган Кансондаги уран бойитиш иншоотини кенгайтириш ишлари ҳам бошланган.
МАГАТЭ бош директори Рафаэль Гросси Шимолий Корея ядровий инфратузилмасининг кенгайишини жиддий ташвиш уйғотувчи ҳолат деб баҳолади. Унинг таъкидлашича, бу фаолият БМТ Хавфсизлик Кенгашининг тегишли резолюцияларига зид.
Шимолий Корея МАГАТЭнинг мамлакат ядровий дастури устидан назорат қилиш ваколатини тан олмайди. Агентлик 2009 йилдан бери Шимолий Корея ядровий иншоотларида инспекция ўтказиш имкониятига эга эмас.
Шимолий Корея расмийлари мамлакатнинг ядровий давлат сифатидаги мақоми ўзгармаслигини билдириб келади. Пхеньян, шунингдек, МАГАТЭнинг Ядровий қуролларни тарқатмаслик тўғрисидаги шартномадан чиққан мамлакат ички ишларига аралашиш учун қонуний ваколати йўқлигини таъкидлайди.
Японияда уйқу мусобақаси бўлиб ўтади, унда ғолиб катта пул мукофотига сазовор бўлади
Дунё харитаси 500 йил ичида илк бор янгиланди
Канадалик олим Трампга Ой кимга тегишли эканлигини эслатиб қўйди
