МАГАТЭ Эронда уранни 60 фоизгача бойитадиган иккита IR-6 центрифуга каскадини аниқлади

Халқаро атом энергияси бўйича агентликнинг (МАГАТЭ) маълум қилишича, Эроннинг Фордо ядро объекти фаолияти Теҳрон ўз зиммасига олган мажбуриятига зид. Бу ҳақда ташкилот маърузасига таяниб Reuters агентлиги хабар тарқатди.

"МАГАТЭ бош директори Рафаэль Гросси Эроннинг ташкилотни хабардор қилмасдан Фордодаги уранни бойитиш заводи конструкциясига ўзгартириш киритганидан хавотир билдирди", – дейилади Reutersнинг ташкилот баёнотига таяниб берган хабарида.

Хусусан, хабарда таъкидланишича, МАГАТЭнинг Фордо ядро объектида кутилмаганда амалга оширган инспекциясидан кейин IR-6 центрифугасида иккита каскад ўртасида бирлаштириш бўйича ташкилотга маълум қилинмаган ўзгартириш амалга оширилган.

Объектда уран 60 фоизгача бойитилиши мумкин. МАГАТЭ Фордо ядро объектини мунтазам равишда текшириб келмоқда ва Теҳрон билан ушбу фаолиятини янада фаоллаштириш бўйича музокара ўтказиб келади, дейилади Reuters хабарида.

22 ноябрда ISNA агентлиги Эрон Фордо ядро объектида IR-6 центрифугасидан фойдаланиб уранни 60 фоизгача бойитишга киришди, деб хабар тарқатган эди.