Лавров: Зеленский музокараларни истамаяпти

Россия ташқи ишлар вазири Сергей Лавров Украина президенти Владимир Зеленский музокаралар ўтказишни истамаётганини ва аввал ҳам бир неча бор музокараларни издан чиқарганини маълум қилди.

Бу ҳақда у Манамада Россия ва Форс кўрфази араб давлатлари ҳамкорлик кенгаши ўртасидаги стратегик мулоқотнинг тўққизинчи раунди якунлари бўйича ўтказилган матбуот анжуманида айтди.

«Бизнинг ягона хулосамиз шу: Зеленский музокараларни истама япти. У аввал ҳам, жумладан, 2019 йил декабрь ойида Парижда бўлиб ўтган учрашувдан кейин ҳам уларни бир неча бор барбод қилган», — деди Лавров.

Вазирнинг эслатишича, 2019 йил декабрь ойида Парижда Франция президенти Эммануэль Макрон, Германия канцлери Ангела Меркель ва Владимир Зеленский Минск келишувларини бажариш зарурлиги, жумладан, Донбасснинг алоҳида мақомини Украина Конституциясида акс эттириш масаласи бўйича қарор қабул қилган. Бироқ, Лавровнинг таъкидлашича, улар бу мажбуриятларни бажаришни режалаштирмаган.

Шунингдек, у 2025 йил ёзида Зеленский Истанбулдаги музокараларни тўхтатганини айтди. Лавровнинг сўзларига кўра, Россия, Украина ва АҚШ ўртасида Абу-Дабида бўлиб ўтган уч томонлама учрашувдан кейин эса Россия ташаббуси билан боғлиқ бўлмаган сабабларга кўра музокаралар жараёнида силжиш кузатилмаган.

«Зеленский ҳатто келишувларга эришиш йўлида олдинга силжишни ҳам истамаётгани аён», — дея хулоса қилди Россия ташқи ишлар вазири.