Кўзлари ожиз 69 ёшли аёл қўшнисини пичоқлаб қўйди

Бухорода кўзлари ожиз 69 ёшли аёл қўшнисини пичоқлаб ўлдирди. Бу ҳақда “Миллий” телеканалида хабар қилинди.

Маълум бўлишича, эркак қўшниси билан бир неча йиллик дўстона алоқада бўлган аёлнинг кўзлари кўрмаган. Шу сабабли эркак тез-тез унинг уйида меҳмон бўлиб турган.

Нафақа пулини олган аёл буни нишонлаш учун қўшниси билан бироз спиртли ичимлик ичган, шундан сўнг маст эркак аёлни ичкиликка яна таклиф этиб, ҳақорат қила бошлаган. Айбланувчи эса ҳақоратли сўзларни эшитгач, қўлидаги ошхона пичоғи билан эркакка ҳужум қилган.

“Мен бундай бўлишини сира истамагандим. Унга доим қўлимдан келганича ёрдам бериб келганман, аммо менга нисбатан ҳурматсизлик қилиб, ҳақоратлагани ва ичкиликка таклиф этавергани учун жаҳл устида ҳужум қилдим. Кўзларим кўрмагани сабабли уни ўлдириб қўяман деб сира ўйламагандим”, деган айбланувчи аёл.

Жиноят ишлари бўйича Когон шаҳар судида аёлга ҳукм ўқилди. У Жиноят кодексининг тегишли моддалари билан 5 йилга озодликдан маҳрум этилди.