Кулеба Украинада ҳаётий таъминот тизимлари издан чиқишини башорат қилди

Украинанинг собиқ ташқи ишлар вазири Дмитрий Кулеба мамлакатдаги вазият ривожланишининг салбий сценарийларидан бири йирик шаҳарларда ҳаётий таъминот тизимларининг издан чиқиши бўлиши мумкинлигини маълум қилди.

У бу ҳақда Axel Springer нашриётлар гуруҳининг YouTube каналига берган интервьюсида гапирди.

Украинадаги ҳозирги вазиятни оғир деб баҳолаган Кулебанинг таъкидлашича, яқин ҳафталар ва ойлар ичида мамлакатни бундан ҳам жиддийроқ муаммолар кутиши мумкин.

«Менимча, энг даҳшатли ҳолат йирик шаҳарда ҳаётий таъминот тизимларининг — электр энергияси, сув таъминоти ва канализация тизимларининг — ишдан чиқиши бўлади», — деди Кулеба.

Украина Стратегик тадқиқотлар институти таҳлилчиси Юрий Королчук ҳам энергетика соҳасидаги муаммолар сабабли жума куни Киев шаҳри ва Киев вилоятида фавқулодда ҳолат эълон қилишга чақирди. Экспертнинг прогнозига кўра, қиш илиқ келган тақдирда ҳам пойтахтдаги вазият яхшиланмаслиги мумкин.

Аввалроқ Украина бош вазири Сергей Корецкий мамлакатни келаётган қишда ўтган йилгига қараганда ҳам мураккаброқ вазият кутиши мумкинлигини айтган эди.

Украиналик энергетика эксперти Станислав Игнатьев ҳам бўлажак қиш 2022 йилдан бери энг оғир қиш бўлиши мумкинлигини таъкидлаган. Унинг фикрича, мамлакат энергетика тизими мавжуд юкламани кўтара олмаяпти.