Куба АҚШ билан эҳтимолий можарога тайёргарлик кўрмоқда

Куба ҳарбийлари АҚШ томонидан бўлиши мумкин бўлган ҳарбий агрессия эҳтимолига тайёргарлик кўрмоқда. Бу ҳақда мамлакат ташқи ишлар вазири ўринбосари Карлос Фернандес де Коссио NBC News’га берган интервьюсида маълум қилди.

Унинг таъкидлашича, ҳозирги халқаро вазиятда бундай хавфни инкор этиш «соддалик» бўлар эди. Шу билан бирга, Гавана ҳарбий сценарий учун аниқ асос кўрмаётганини ва можаро юз бермаслигига умид қилаётганини билдирган.

Баёнотлар Венесуэла даги АҚШ операциясидан кейин муносабатлар кескинлашгани фонида янгради. Унда мамлакат президенти Николас Мадуро қўлга олингани маълум қилинган. Шундан сўнг Вашингтон минтақада қўшимча чоралар кўрилиши мумкинлигини билдирган.

АҚШ давлат котиби Марко Рубио Куба ҳукумати «хавотир олиши керак»лигини айтган. Шу билан бирга, АҚШ президенти Дональд Трамп январ ойида Кубага нефть етказиб берувчи давлатларга қарши эҳтимолий тарифлар жорий этиш ҳақида фармон имзолаган.

Бу қарор оролдаги энергетик инқирозни кучайтирган: март ойида ёқилғи танқислиги сабаб электр таъминоти бир неча бор узилган.

Куба томони нефть блокадасини АҚШнинг «агрессияси» деб баҳолаб, мамлакат суверенитети сақланиб қолишини таъкидламоқда.