Криштиану Роналду шу йил футболдан кетиши мумкин

Криштиану Роналду шу йил футболдан кетиши мумкинлигини маълум қилди.

41 ёшли португалиялик футболчи бу ҳақда Vogue нашрига берган интервюсида айтди.

"2026 йил мен учун футболдаги охирги йил бўлиши мумкин. Мен ўзимдан кейин ҳамма соғинадиган тарих қолдиришни ва келажакда оилам билан кўпроқ вақт ўтказишни хоҳлайман. Футбол ўзидан кейин катта бўшлиқ қолдириши мумкинлиги сабабли, уни турли машғулотлар билан тўлдириш керак.

Кўпроқ саёҳат қилиш, ўзимга ёқадиган ўйинлар ўйнаш ва ушбу 25 йил давомида ишлаб топганларимдан баҳраманд бўлишни истайман", — деди Роналду.

Криштиану Роналду беш карра Чемпионлар лигаси ғолиби, Европа чемпиони ва икки карра Миллатлар Лигаси ғолиби. У миллий жамоалар, Европа чемпионатлари, Чемпионлар лигаси ва Клублар ўртасидаги Жаҳон чемпионати тарихида энг кўп гол урган футболчи ҳисобланади.

Роналду 2022 йил декабридан бери Саудия Арабистонининг “Ал-Наср” клубида ўйнаб келмоқда. Ҳужумчи фаолияти давомида Португалиянинг “Спортинг”, Англиянинг “Манчестер Юнайтед”, Италиянинг “Ювентус” ва Испаниянинг “Реал Мадрид” клублари сафида ҳам тўп тепган.