“Upl.uz” сайтининг хабар беришича, Қашқадарё вилояти Косон туманида тадбиркор аёл туман ҳокими Бахтиёр Ражабов томонидан калтакланган.
Маълумотларга кўра, Фазилат Нормуродова аризасининг натижасини билиш учун ҳоким қабулига келган.
“Ҳоким мени кўриши билан жаҳлланиб кетди. Мени иғвогар ва порталга шикоят қиладиган туҳматчи дея ҳақоратлади. Мен эса порталнинг вазифаси муаммоларни ҳал қилиш эканлигини айтиб, хонадан чиқдим, ортимдан ҳоким ҳам чиқди. Унга энди нима қилишим кераклигини айтганимда менга ташланиб қолди. Бир қўли билан бўғиб, иккинчи қўли билан калтаклай бошлади. Одамлар бизни айириб олишди”, деди аёл.
Воқеадан кейин Фазилат Нормуродова касалхонага тушган. Унга мия чайқалиши ташхиси қўйилган. Аёл ҳоким устидан прокуратурага шикоят қилган. Ҳоким эса телефон орқали суҳбатда айни дамда ишлари билан оворалиги, аёл кишига қўл кўтариш одати йўқлигини таъкидлаган. Прокуратура вазиятни ўрганмоқда.
