"Кайфият жуда ёмон": Киев урушнинг тугашига тайёрланмоқда

Кейинги тўрт-беш ой фронтда ҳал қилувчи бўлиб, иккала томон ҳам тинчлик музокараларига чиқадиган позицияларни белгилайди, деб ёзади Reuters Киевдаги суҳбатдошларига таяниб.

Журналистлар билан махфий равишда суҳбатлашган юқори лавозимли Украина амалдори Доналд Трампнинг Оқ уйга қайтиши Киевни урушнинг тугаши ҳақида ўйлашга мажбур қилаётганини айтди: "Бу қиш ҳал қилувчи пайтдир... Уруш якунига яқинлашаётганига умид қиламан. Айни дамда биз музокаралардаги ҳар икки томоннинг дастлабки позицияларини белгилаймиз."

Хусусан, украиналиклар Трамп Украинага нисбатан сиёсатни қандай шакллантиришини билиш учун хавфсизлик ва мудофаа соҳасидаги асосий лавозимларга кимни сайлашини кутмоқда. Масалан, Трампнинг янги жамоасига Киевда украинапараст саналган собиқ давлат котиби Майк Помпео кирмаслиги аллақачон маълум.

Киев расмийси Трамп ғалабасидан кейин Украинанинг НАТОга таклиф қилиниши "эҳтимоли камроқ"лигини айтди ва Трамп даврида ҳарбий ёрдамнинг қисқариши хавфи борлигини тан олди. "Умид қиламанки, Байден маъмурияти ёрдам тезлигини тезлаштириш орқали бу хавфдан қочишга ҳаракат қилади," - деди украиналик амалдор.

Шу билан бирга, Киев Байден маъмуриятидан ҳафсаласи пир бўлганини деярли яширмайди, унинг Украинага ёрдам беришдаги қадамлари, айниқса, сўнгги бир йилда заиф ва етарли бўлмаган. "Украинада кайфият жуда ёмон. Сиз Зеленскийнинг сўнгги баёнотларида ўсиб бораётган умидсизликни кўришингиз мумкин," - деди Киевдаги юқори даражадаги дипломатик манба.