Канада Хитой билан стратегик ҳамкорликни йўлга қўймоқчи

Канада бош вазири саккиз йил ичида илк бор Хитойга расмий ташриф билан келди. Пекинда ХХР раиси ва Хитой Коммунистик партияси Бош котиби Си Цзиньпин билан бўлиб ўтган учрашувда Марк Карни икки давлат ўз муносабатларини янгидан шакллантириш ниятида эканини билдирди. Хитойнинг Xinhua ахборот агентлиги хабарига кўра, Канада мустаҳкам ва барқарор стратегик ҳамкорликка интилаётганини маълум қилди. Мақсад — ҳар икки мамлакат халқлари фаровонлигини ошириш. Ҳамкорлик савдо, энергетика, қишлоқ хўжалиги, молия, таълим ва иқлим ўзгаришига қарши кураш соҳаларида кенгайтирилиши режалаштирилган.

Си Цзиньпин, шунингдек, у ва Карни ўтган йилнинг октябрь ойида Жанубий Кореяда бўлиб ўтган АТЭС саммити доирасида учрашганини эслатди. Унинг сўзларига кўра, айнан ўша пайтда томонлар ҳамкорликни қайта тиклаш бўйича фаол муҳокамаларни бошлаган.

Мазкур ташриф АҚШ президенти Доналд Трамп томонидан ҳар икки давлатга нисбатан босим кучайиб бораётган бир пайтда амалга ошди. Бунга қадар Оттава ва Пекин ўртасидаги муносабатлар совуққон эди: 2018 йилда АҚШ талаби билан Канадада Huawei компаниясининг молиявий директори Мэн Ваньчжоу ҳибсга олиниши Хитойнинг кескин жавобига сабаб бўлган (икки нафар канадалик фуқаро қўлга олинган) ва шундан буён таранглик сақланиб келмоқда.

Канада бош вазири Марк Карни Хитойга етиб келганидан сўнг X ижтимоий тармоғида шундай ёзди:
«Бора-бора парчаланиб ва беқарор бўлиб бораётган дунёда биз ушбу муносабатларни янгилашга ҳамда янада мустаҳкам умумий келажак устида ишлашга эътибор қаратмоқдамиз».