Камёб Apple компьютери $1,15 миллионга сотилди

Apple тарихидаги энг камёб компьютерлардан бири Нью-Йоркдаги Bonhams аукционида 1,15 миллион долларга сотилди. 14 октябрь куни бўлиб ўтган савдолар якунида икки харидор компьютер учун нархни оширишда давом этди. Натижада Apple-1 русумли серияли компьютерлар орасида рекорд нарх қайд этилди.

Hatfield деб номланган компьютер 1976 йилда — Apple компанияси ташкил этилган йили ишлаб чиқарилган. У ҳозиргача ишлаш ҳолатини сақлаб қолган. Компьютернинг электрон платасида компания ҳаммуассиси Стив Вознякнинг имзоси ҳам бор.

Компьютер билан бирга харидор 1978 йил январда Стив Жобс томонидан ёзилган хатни ҳам қўлга киритди. Ўша пайтда Жобс компьютернинг дастлабки эгаси Фред Хэтфилдга уни 4 килобайт хотирага эга, янгироқ Apple II модели платасига алмаштиришни таклиф қилган. Бироқ Хэтфилд таклифни рад этган ва тарихий компьютерни сақлаб қолган.

Apple-1 компаниянинг биринчи маҳсулоти ҳисобланади. Компьютер йиғилган электрон плата кўринишида сотилган бўлиб, унга клавиатура ва мониторни фойдаланувчининг ўзи улаши керак эди.

Apple-1 реестри маълумотларига кўра, ушбу моделнинг 94 та нусхаси мавжудлиги тасдиқланган. Bonhams аукцион уйи баҳолашича, ҳозиргача уларнинг 75 тадан кам нусхаси сақланиб қолган, ишлайдиганлари эса бундан ҳам кам.

Савдолардан олдин Hatfield компьютерининг қиймати 500 мингдан 800 минг долларгача баҳоланган эди. Бироқ якуний нарх энг юқори прогноздан ҳам анча ошиб кетди.