Калифорнияда New York Times ходими отиб ўлдирилди

Калифорния штатида New York Times ходими отиб ўлдирилди. Қотилликда марҳумнинг қайнота ва қайнонаси — 77 ёшли Шоуюн Чжан ва Шили Чен гумонланиб, қўлга олинди.

Полиция маълумотига кўра, 40 ёшли Жонатан Маккинси шанба куни тушдан кейин Сан-Францискодан 56 километр узоқликдаги Дублин шаҳрида спорт мажмуаси ёнидаги автотураргоҳда кўп сонли ўқ яралари билан топилган.

Маккинси New York Times'да ўйинлар тажрибаси йўналишида муҳандислик ишланмалари директори бўлиб ишлаган. Газета унинг ўлимидан хабар топганини тасдиқлаган.

Гувоҳларнинг айтишича, воқеа жойида бир нечта ўқ овози эшитилган. Улардан бири Маккинси отилиб, ерга йиқилганини кўрганини айтган.

Яна бир гувоҳ кекса жуфтликни воқеадан сўнг хотиржам тарзда ҳодиса жойини тарк этаётганини кўрганини билдирди. Улар бир неча дақиқадан сўнг йўлдан ўтаётган полиция ходими томонидан ушланган.

Марҳумнинг қайнота ва қайнонасига биринчи даражали қотиллик, жумладан бир қатор айбловлар қўйилган. Ҳозирда улар ҳибсда сақланмоқда.

Қотиллик сабаби ҳозирча маълум қилинмаган.