Италияда жарроҳлар ўсмирнинг белидан велосипед тормози дастагини олиб ташлади

Италияда шифокорлар 13 ёшли ўсмирнинг белидан узунлиги 5,5 сантиметр бўлган велосипед тормозининг металл дастагини жарроҳлик амалиёти орқали олиб ташлади. Бегона жисм уч йил аввал бола велосипеддан йиқилганида унинг танасига кириб қолган. Бу ҳақда Ватиканнинг Bambino Gesù болалар шифохонаси маълум қилди.

Шифохонанинг ортопедия ва травматология бўлими раҳбари Пьер Франческо Костичининг айтишича, ўсмир уч йил давомида жиддий аломатларсиз одатий ҳаёт кечирган.

13 ёшида боланинг ўнг оёғида оғриқ пайдо бўлган, кейинчалик иккала оёғида ҳам ноқулайлик сезилган. Унинг умуртқа поғонаси рентген текширувидан ўтказилганда бел соҳасида бегона металл жисм борлиги аниқланган.

Компьютер томографияси натижаларига кўра, велосипед тормозининг дастаги чап ён томондан кириб, бел умуртқалари соҳасидаги нерв илдизи яқинида жойлашиб қолган. Уч йил давомида унинг атрофида фиброз тўқимадан иборат қоплама ҳосил бўлган.

Жарроҳлар учун асосий қийинчилик металл жисмнинг умуртқалараро тешикда, нервга жуда яқин жойлашгани бўлган. Нерв фаолиятини сақлаб қолиш учун шифокорлар уни бегона жисмдан эҳтиёткорлик билан ажратишга мажбур бўлган. Натижада дастак тўлиқ олиб ташланган.

Жарроҳлик амалиёти қарийб уч соат давом этган. Амалиётдан кейинги куннинг ўзида ўсмир ўрнидан тура олган ва бир неча кундан сўнг шифохонадан чиқарилган.

Тиббиёт муассасаси маълумотига кўра, тикланиш жараёни муваффақиятли якунланган. Назорат текширувида, жумладан, асаб тизими билан боғлиқ ҳеч қандай асоратлар аниқланмаган.