Илон Маск тарихда бойлиги 600 миллиард доллардан ошган биринчи инсонга айланди — Forbes

Нашрга кўра, Маск дунёдаги илк триллионерга айланиш сари яна улкан қадам ташлаган. Декабр ўрталарида у асос солган SpaceX компанияси қиймати 800 миллиард долларга баҳоланган, августда бу кўрсаткич 400 миллиард доллар эди.

Баҳолаш 2026 йилда режалаштирилаётган SpaceX IPO'си олдидан амалга оширилган. Акциялар жойлаштирилиши тарихдаги энг йирик IPO бўлиши мумкинлиги қайд этилган.

Мазкур баҳолаш Маскнинг бойлигини, унга SpaceX акцияларининг тахминан 42 фоизи тегишли эканини ҳисобга олганда, 168 миллиард долларга ошириб, қарийб 677 миллиард долларга етказган.

IPO ўтказилмаган тақдирда ҳам Маскни триллионерга айлантириши мумкин бўлган SpaceX'даги улуши ҳозир унинг энг қиммат активидир: бу улуш 336 миллиард долларга баҳоланмоқда. Шу билан бирга, Маскнинг Tesla'даги 12 фоизлик улуши 197 миллиард долларга тенг. Бундан ташқари, Маскга тегишли бўлган хAI Holdings компанияси (сунъий интеллект асосидаги Grok чат-ботини ривожлантиради) ҳозирда 230 миллиард доллар баҳо билан янги инвестисиялар жалб этиш бўйича музокаралар олиб бормоқда. Бу Маск компанияни ташкил қилган пайтда айтган 113 миллиард долларлик баҳодан икки баробардан кўпдир.