Илон Маск сиёсатга қайтишга қарор қилди – The Wall Street Journal

Газетанинг хабар беришича, америкалик миллиардер сиёсий фаоллигини кучайтириб, яна республикачиларга йирик хайриялар ажратишни бошлаган ҳамда АҚШ президенти Доналд Трамп билан муносабатларини тиклаган. Бу ҳолат 2026 йил ноябрида ўтказиладиган Конгрессга оралиқ сайловлар билан боғланмоқда.

Маълумотларга кўра, йил бошидан буён Илон Маск республикачи Нейт Морриснинг сайлов кампаниясини қўллаб-қувватлаш учун 10 млн доллар йўналтирган. Узоқ йиллик сенатор Митч Макконнелл сиёсатдан кетганидан сўнг Моррис Кентукки штатидан сенатор бўлиш учун номзод сифатида кўрилмоқда.

"Маскнинг сайлов жараёнидаги иштироки формати бўйича якуний қарор ҳали қабул қилинмаган. У 2024 йилда Трампнинг сайлов кампаниясини қўллаб-қувватлаш учун ташкил этилган America PAC фтнди орқали молиялаштириш ва бошқа вариантларни кўриб чиқмоқда", дея ёзмоқда Politico.

2024 йилдаги президентлик сайлов кампанияси вақтида Маск Трамп ва республикачиларни қўллаб-қувватлаш учун қарийб 300 млн доллар сарфлаган ва АҚШдаги энг йирик маълум сиёсий донор сифатида қайд этилган. 2025 йил июнидан буён эса унинг хайриялари атиги 42 млн долларни ташкил қилган.