Ҳиндистон 1,4 миллиард аҳолини рўйхатга олишни бошлади

Мамлакатда пандемия сабабли бир неча йилга кечиктирилган аҳолини рўйхатга олиш тадбирига старт берилди. Бир йил давом этадиган ушбу йирик лойиҳага 3 миллиондан ортиқ ходим жалб этилган бўлиб, улар 640 мингта қишлоқ ва шаҳарлардаги ҳар бир хонадонга шахсан ташриф буюришади.

Жараён икки босқичда амалга оширилади: аввал уй-жой шароитлари ўрганилади, сўнгра аҳолининг ижтимоий-иқтисодий ҳолати ва касталари ҳақида маълумот тўпланади.

Бу галги тадқиқот Ҳиндистон тарихида илк бор рақамли форматда, яъни махсус мобил иловалар ва веб-портал ёрдамида ўтказилмоқда. Фуқароларга маълумотларни онлайн тарзда мустақил тўлдириш имконияти ҳам яратилган. Ҳукумат 1,3 миллиард доллар маблағ сарфланадиган ушбу лойиҳа орқали мамлакатнинг янгиланган демографик манзарасини аниқлашни мақсад қилган.