Ҳаммаси октябрда ҳал бўлади: БМТга аёл киши раҳбарлик қилади

Коста-Рикалик дипломат ва мамлакатнинг собиқ вице-президенти Ребека Гринспан БМТ бош котиби лавозими учун курашда пешқадам бўлди. Бу ҳақда The Guardian хабар берди.

БМТ Хавфсизлик кенгашида ўтказилган дастлабки махфий овоз беришда Гринспан 10 та овоз олган. Тўрт нафар аъзо уни қўллаб-қувватлаш ёки қарши чиқиш бўйича аниқ позиция билдирмаган, бир нафар аъзо эса қарши овоз берган.

Унинг энг яқин рақиби — Гайананинг БМТдаги собиқ элчиси Кэролин Родригес-Беркетт 9 та «ёқлайман» овозига эга бўлган. Икки нафар аъзо унга қарши овоз берган, тўрт нафари эса бетараф қолган.

БМТ бош котиби сайлови жараёни октябр ойида якунланиши кутилмоқда.

Ғарблик дипломатлардан бири Гринспанни амалдаги бош котиб Антониу Гутерришнинг норасмий қўлловига эга бўлган «давомчи номзод» сифатида кўраётганлар борлигини айтган.

Гутерришнинг иккинчи ва сўнгги муддати 2026 йил 31 декабрда якунига етади. БМТдаги норасмий минтақавий ротация тамойилига кўра, унинг ўрнига Лотин Америкаси вакили келиши кутилмоқда.

Агар Гринспан сайланса, у БМТ бош котиби лавозимини эгаллаган биринчи аёл ва биринчи яҳудий шахс бўлади.

The Guardian маълумотига кўра, Гринспаннинг ота-онаси Польшада туғилган ва кейин Марказий Америкага кўчиб келган. Унинг она томондан бувиси ва бобоси нацистлар томонидан ўлдирилган.

Гринспан Исроилнинг палестиналикларга нисбатан сиёсатига танқидий муносабатда бўлиб келади. Айни вақтда у БМТнинг Савдо ва тараққиёт конференцияси — ЮНКТАДга раҳбарлик қилмоқда. Ушбу ташкилот Исроилнинг Фаластин ҳудудларидаги ҳаракатлари оқибатида юзага келган иқтисодий зарарни ҳужжатлаштирган.

Гринспаннинг Исроил билан оилавий алоқалари ҳам бор. Унинг синглиси 17 ёшида Исроилга кўчиб ўтган, жияни ва жиянчаси эса Исроил армиясида мажбурий ҳарбий хизматни ўтаган.